ബലേ ഭേഷ് ശശി തരൂർ.താങ്കളുടേത് വീരപരാജയം

ഖാർഗെ പടി കയറുന്നു. അഭിനന്ദനങ്ങൾ. സോണിയ പടിയിറങ്ങുന്നു. മോദിയേയും BJP യേയും നേരിടാനുള്ള ഒരു പാർട്ടിയായി കോൺഗ്രസ് സടകുടഞ്ഞെഴുന്നേൽക്കേണ്ട സന്ദർഭമാണിത്. തോൽക്കുമെന്നറിഞ്ഞുകൊണ്ട് മത്സരിക്കാൻ നല്ല ചങ്കൂറ്റം വേണം. ഇലക്ഷൻ സുതാര്യവും സത്യസന്ധവും ആയിരുന്നില്ലെന്ന് ആരോപണം ഉണ്ട്. തരൂർ – താങ്കളെ ഏകകണ്ഠമായി തിരഞ്ഞെടുത്തിരുന്നുവെങ്കിൽ അതൊരു ചരിത്ര സംഭവമാകുമായിരുന്നു

കോൺഗ്രസ്സുകാർ അല്ലാത്തവരെയും പാർട്ടിയിലേക്ക് ആകർഷിക്കാൻ ഉതകുന്ന പരിപാടികളും പദ്ധതികളും താങ്കൾ മുന്നോട്ട് വച്ചു. താങ്കളുടെ സ്ഥാനാർത്ഥിത്വം ബഹുഭൂരിപക്ഷം പേർക്ക് ആവേശവും പ്രത്യാശയും നൽകി. എന്നാൽ കേരളത്തിലുള്ള നേതാക്കളിൽ പലരും അസൂയകൊണ്ട് താങ്കൾക്കെതിരായി തിരിഞ്ഞു, വടക്കുനോക്കിയന്ത്രം പോലെ പാർട്ടിയെ മാറ്റി. ചലനവും വികാസവുമാണ് ജീവൻ്റെ ലക്ഷണം.

കോൺഗ്രസ് ഇന്ന് സർവ്വപ്രതാപങ്ങളും അസ്തമിച്ച് തകർച്ചയുടെ വക്കിലാണ്. ലോകസഭയിലെ അംഗസംഖ്യ 450 ൽ നിന്ന് 52 ലേക്ക് ചുരുങ്ങി. സംസ്ഥാനങ്ങളിലെ ഭരണം കൈവിട്ടു .രാഹുലിന് പോലും വിജയിക്കാൻ വയനാട്ടിലേക്ക് വരേണ്ടി വന്നു. രാഹുലിൻ്റെ ജോഡോ യാത്ര തണുത്തുറഞ്ഞ് കിടന്ന കോൺഗ്രസിന് വലിയ ആവേശം നൽകി.

125 വർഷങ്ങൾക്കു മുമ്പാണ് മലയാളിയായ ചേറ്റൂർ ശങ്കരൻ നായർ കോൺഗ്രസ് പ്രസിഡണ്ടായത്. അതിനു ശേഷം ഒരു മലയാളിയായ താങ്കൾ പ്രസിഡണ്ടായി വരണമെന്നായിരുന്നു എൻ്റെ ആഗ്രഹം. എഴുത്തുകാരൻ, വാഗ്മി, സംഘാടകൻ, ലോകസഭാംഗം, യു.എൻ ഭാരവാഹി എന്നീ നിലകളിൽ തരൂർ രാജ്യത്തിനകത്തും പുറത്തും പ്രശസ്തനായിരുന്നു.

എനിക്കൊരു കാര്യത്തിൽ ഉറപ്പാണ്. താങ്കൾ എന്നും കോൺഗ്രസ്സിനൊരു അസറ്റായിരിക്കും. പാർലമെൻ്റിനകത്തും പുറത്തും തെറ്റുകൂടാതെ നാലുവാക്കു പറയാൻ കഴിയുന്നവർ കോൺഗ്രസിൽ ചുരുക്കമാണ്. തോൽവി വിജയത്തിലേക്കുള്ള ചവിട്ടുപടിയാണ് . ചെറുപ്പക്കാരുടെ ആവേശമായ തരൂർ – താങ്കളെ കാലം പ്രതീക്ഷയോടെ കാത്തിരിക്കുന്നു: .

പ്രൊഫ ജി ബാലചന്ദ്രൻ